Нури ҳаррӯза, 1 Ноябр: Хушо касе ки маро мешунавад

Хушо касе ки маро мешунавад, ҳар рӯз назди дарвозаи ман бедор меистад ва паҳлудариҳои маро нигаҳбонӣ мекунад!

Масалҳо 8:34

Инак, чунон ки чашмони ғуломон сӯи дасти оғоёни онҳост, чунон ки чашмони каниз сӯи дасти хотуни ӯст, ончунон чашмони мо сӯи Худованд Худои мост, то даме ки ба мо марҳамат намояд.

Забур 122:2

Қурбонии сӯхтании доимӣ дар наслҳои шумо назди даромадгоҳи хаймаи ҷомеъ ба хузури Худованд хоҳад буд, ки дар он ҷо ба шумо зоҳир хоҳам шуд, то ки дар он ҷо ба ту сухан гӯям.

Хуруҷ 29:42

Дар ҳар ҷое ки Ман зикри исми Худро муқаррар намоям, Ман назди ту омада, туро баракат хоҳам дод.

Хуруҷ 20:24

Зеро дар ҷое ки ду ё се кас ба исми Ман ҷамъ шаванд, Ман дар миёни онҳо ҳастам.

Инҷили Матто 18:20

Лекин соате мерасад, ва аллакай расидааст, ки парастандагони ҳақиқӣ Падарро ба рӯҳ ва ростӣ парастиш хоҳанд кард, зеро ки Падар толиби ин гуна парастандагони Худ мебошад: Худо рӯҳ аст, ва онҳое ки Ӯро парастиш мекунанд, бояд ба рӯҳ ва ростӣ парастиш кунанд.

Инҷили Юҳанно 4:23–24

Дар ҳар вақт дар Рӯҳ бо ҳар дуо ва илтимос дуо гӯед.

Нома ба Эфсӯсиён 6:18

Пайваста дуо гӯед.

1 ба Таслӯникиён 5:17

Ва номи Ӯ Аҷиб, Мушовир, Худои Ҷаббор.

Ишаъё 9:6

Ва бар Ӯ Рӯҳи Худованд, рӯҳи ҳикмат ва хирад, рӯҳи машварат ва қудрат, рӯҳи шинохтани Худованд ва тарси Ӯ қарор хоҳад гирифт. Ва рӯҳи худотарсӣ Ӯро пур хоҳад кард, ва Ӯ на бар тибқи нигоҳи чашмонаш.

Ишаъё 11:2–3

Оё ҳикмат даъват наменамояд? Оё хирад овози худро намебарорад? «Шуморо, эй шахсон, даъват менамоям, ва овози ман барои банӣ‐одам аст. Эй соддадилон! Фаросат биомӯзед, ва эй аблаҳон, дониш биомӯзед. Бишнавед, чунки суханони муҳим мегӯям, ва он чи аз лабҳои ман мебарояд, рост аст, Машварат ва зиракӣ дар ман аст; ман хирад ҳастам; қувват дар ман аст.

Масалҳо 8:1, 4–6, 14

Ба амал меояд, ки қарордоди Ӯ аҷоиб аст, ва ҳикмати Ӯ бузург аст.

Ишаъё 28:29

Ва агар касе аз шумо аз ҳикмат камӣ дошта бошад, бигзор талаб кунад аз Худое ки ба ҳама бо саховат ва бе сарзаниш ато менамояд, — ва ба вай ато хоҳад шуд.

Яъқуб 1:5

Бо тамоми дили худ ба Худованд таваккал намо, ва ба хиради худ такья накун. Дар ҳамаи тариқҳои худ Ӯро дарк намо, ва Ӯ роҳҳои туро ҳамвор хоҳад кард.

Масалҳо 3:5–6